s Tierdl


Ei Preibsch Onkls sannr Warkstood wor immr Labn und Spektakl. Se machtn dorte de Bierfassl for die ganze Gegnd, Vortl-Hekto, Holb-Hekto und ou Hektolittre; ajeds Staatl hotte jo sei Bräuhaus, Niems, Gobl, Leipe, Zwiecke, sugot Woltn und nundr eis Niedrland, bis of Heinschpach totn se liefrn. Dr Onkl wor ej lostischr Mohn und do gings bei dr Arbt ou immr vrgniegt zu undrn Geselln und bann Liehrjungn. Gesangsvereinsobmann wor dr Onkl ou noch und dr Gesangverein wor dorte sehr wichtich, jeds Juhr machte dar ejne gruusse Uffiehrung, zu das de Leute vu weit har komm. Do wure dn ganzn Harbst und n holbn Wintr jede Metwoche geprobt ann Wortshause, im de Letzt rimm sugor n ganzn Tag bei dr Arbt.

Dos Juhr hottn se siech iborhaupt vill viergenumm, "De Wette wolldn se spieln und olle Rolln worn ann bestn Händn, bis siech dr Bäckn Korl n Orm broch bann Holzfohrn ann Heeture, dar hotte solln n Gostwort spieln und jtz worn ock noch vorz Tage Zeit. A jedr, dar ej Bejn hotte, wor jo eigetejlt, war sollde do jetz einspringn?

Im die Zeit tro bann Onkl ej neuor Geselle oh und wi das dor Malleer horrte, sohte ar glei: "Na, dos kennde jo iech machn." "Nu, wennde diech traust, dos ei dann vorz Tagn olls noch zu larn?"Dos wär kejne Sache, dos täte ar brejtn und su hulltr siech ou worklich glei de Rolle und fing wie ej Wildr oh zu larn. Zorrletzt konnde schonn de ganze Warkstoot de Rolle auswendch, abr mei liebr Anton blieb immr wiedr bei das Stelle: "Muttr Franze, hoppe, tanze ... " stackn. Ao g(k)uckte amol s Tantl zor Warkstoottiere nei und sohlte: "Anton, weste woos? Hindr dr Biehne is ej Tierdl und wennde imschmeissn sllst, do machste ock enn Sootz und weg biste." De Liehrjungn prilltn immr schonn ann Schure, wennr stackn blieb ". . . hoppe, tanze" " . . . fuchzn Gild gewinnt mr saldn!!" Abr n Obr drfieri bei dr Hauptprobe ging drno olls wie geschmeert.

Su koom dr Festobt ro und olle Leute zugn s schiennste Zeug oh und stacktn s ganze Gald ei. Dr Sool wor gerommelt vuul Leute. Dr Lehror diregierte n gemischtn Chur, doss ejne Frejde wor und machte seine Sache gutt. Drno kooms Theatrstickl. Und dos musstn dr Neid lossn, s klappte oll wie geschmieert. Dr Anton wor worklich ej schinnr Wort und brette seine Sache.At stallte siech brejtbejnich vorn Sejgr. wie dos de Rolle vierschreibt und fin oh: "Mittr Franze, hoppe, tanze . . ." do wo dr Foodn wag, ar trot vu enn Bejne ofs andr und s holf ou nischt, doss vunn hindr Bänkn de Liehrjungn fischprtn: "Fuchzn Gildn, fuchzn Gildn!"

S Tantl soss ei dr orschtn Reige und konnde sich dos Ding ganz aus dr Nehnd ohsahn. Of ejmol plääkte se ann Sool: "Anton, s Tierdl, s Tierdl!!" Do machte dar enn Sootz und weg woror. Geschwind liessn se n Vurhang rundr. Dr ganze Sool prillte vorr Lachn, war wejss eb se su gelacht hättn, wenn olls gutt gangn wär.

Na s Programm wor jo noch lang und ou glei wettr, abr dr Anton liess siech nimmej blickn.

S will abn olls ne ock gelarnt, nej ou gekonnd sein!