Dar neue eisorne Schlittn
Unse Muttre drzahlte immr, dosse os Kindr of dr Quorkquetsche Schlittn gefohrn wärn und doss miersch do vill bessr hättn, wal mier su enn schinn hilzorn Schlittn hottn. De kuffn worn sugor mit Eisn besclohn und wnn dos a bissl obgefohrn wor, sauste dr Schlittn ordndlich n Barg nundr und brejtbejnich wieor wir, kipptr oune su leichte im. Do wärsch gornee nutwendich gewaast, doss miersch s Christkindl su enn neumodschn eisorn Schlittn brocht hood. Fohrn tote dar jo noch amol su geschwinde, abr halt ou imkippn, walor su schmol und lang wor.
Obgefohrn seimr aus Flejschors sann Hofe orscht gelche nundr bis of de Strosse und wemmre orndlich Schwung hottn, gings drno s ganze Dorf nundr. Kej Mensch hood domols Osche gestreet. N Kindrn mosste jo die Frehde gelossn wardn.
Lenkn larnte mrorscht noch und noch und wie ich daan eisorn Schlittn kriggt hotte, brette ichs noch gorne orndlich, dos mosste orscht lansom droffe ausprobiert wardn. S orschte Mol kippte ei dr Dreje ejfach im, s zwejte Mot streiftr Hartforts hilzornes Kreuzem dos stond abr feste und rockte ock ej klej bissl of de Seite, aber drno possierte dos Unglicke. De Muhm Karline hotte ibr de Feiortage Besuch ei ihrn klenn Hoisl nabn unsn und die dichtsche Frou, die dort wor, hotte wos, wos bei uns noch niemand gesahn hotte, enn Stalzfuuss, su gingse immr mit enn Stackn. Die dichtsche Frou koom vunn Bäckn raus im die Ecke, wie ich of mann eisorn Schlittn n Barg runde sauste. Dar Schlittn hottes ou grode of dann Stalzfuss obgesahn und roste druf zu znd do log die orme Frou ou schonn ann Schniee. Mit mier ging de Rejse noch a Sticke wettre bis se ann Strossngrobn ihr Ende fond. Vu dorte schlieclh ich miech hejm. (Wos Fohrerflocht is, woostich domols jo noch nee.)
N Schlittn stalltiech ei de Scheine und sotzte miech ei dr Stube os Fanstr, gewartich, doss de Muhm Kaline jo gleich rimmkomm wiere.
Do ging driebn ou schonn s Gartltierdl und se kohm mit ennre Flosche ei unsn Hofe eihindr. "Jetz hulltse Spiritus ei unsn Lodn und drzählts n Tantl" dos stond bei mier feste. Mier pumporte s Harze bis ann Hols.
Dos min Spiritusse kanntn mier Kindr vill zu gutt. Jedsmohl wemmr wu e Sticke wag horrn, schutte a Tantl ganz ejfach ehne Pfitze Spiritus dribt, mier konndn prilln wie mr wolldn. "Do words ne orscht biese" sohte se.
Noch ennre sehr alngn Weile kohms Tantl wiedr rei ausn Lodn und de Muhm Karline, dos sogch mit enn holgn Ouge, ging wiedr ann Hofe eifier. Ofs Tantl traute ich miech jo ou ne zu g(K)uckn, itz mosstes jo komm. Abr se sohte gornischt. Ei ennre Weile konnde ichs nimmej vorrbrengen und frohte: "Wos hood denn de Muhm Karline gewollt?" "Pettrleum" sohtes Tantl. Mier vorschlugs de Rede, do hottse jo gornischt gesoht! Ejne ganze Fuhre Stejne kollortn vu mann Harzan - amende wor ihrhaupt nischt possiert?! Su worsch ou worklich - jemand hotte dar Frou ufgeholn und miech hottse gorne drkannt.
Bei uns honnse sich drnooch sehr gewundort, doss ich lange nimmej Schlittn fohrn giehn mochte und schonn gornee mit daan neun eisorn Schlittn.
