Raachtr Schwung
Ne jammorn im die gudn Johre!
Mir is mit siebzich ou noch jung;
Wos scharn diech die weissn Hoore,
Host du ock sunst daan raachtn Schwung.
Wenn moichmol ou de Schue drickn
Und tun die Zinn ej bissl wieh,
Dos lässt sich olles wiedr flickn,
Dann giehtdrsch gutt os ie noch nie.
Hoit biste ubn, morn undn
Und ibrmorn wiedr nuff;
War siech do ejmol neigefundn,
Daan is dos wurscht, dar pfeift do druf.
Is s Harze offn richtschn Plotze,
Do hoodmr ou daan raachtn Schwung.
Fällt off de Bejne wie de Kotze
Und is mit siebzich Johrn jung.
Ihr Froun und Mannr olle, olle;
Hiert off mei Wurt und losst euchs sohn;
Sport Zank und Streit, dos kost euch Golle,
Hood noch kenn Menschn gutt geton.
Wo wartr schäbisch, alt, verrunzelt
Und seid im zahn Juhr ehndr tuut;
War harzlich lacht und lostich schmunzlt,
Daan sein de Leute olle gutt.
Do wartr neunzich undnoch driebr,
Seid, meiner Seele, do noch jung
und gitt eis bessre Jenseits niebr
Ganz sichr noch mit rachtm Schwung.