"Du bist de Gruusse!"


Meine Schwastr wor os kleijnes Kind ej richtschr Quaatschbolg. Wenn ej Fremdes zorr Stubbtiere reikoom, vrkruuch se siech ann hindrschtn Winkl odr hindr Muttrsch Rook und wemmorsche ock ohsoog, fing se schonn oh zu dudln.

Iech wor do aus ganz andrn Holze und su wor iech halt ou immr bann bornebrotn, s mochte sein wos wollde, olls koom of miech und wenn iechs zahnmol ne gemacht hotte. "Du bist de Gruusse, du mosst Vrstand honna" hiss's. Wenns Tantl grode ne bei Laune wor und de Klehne wiedramor heulte, hottiech, en iech miech imm und ohgesahn hoh, ejne Tachtl drinne und de Klejne kriggtes ou sehr geschwinde raus, dossr nischt possierte und do machte se mier ollrhand zufleisse, ou worsche ej richtichr Schodehoft und machte olls eizwee, se wollde siech immr ohsahn, wies Spielzeug innwendich aussoog und ich solldes dann gewaast sein. "Dos kohn de Klejne jo nee gemacht honn!"

Wenn imm Anna rimm offn Gemeihnflackl de orschtn Ruusnarpl reif worn, schictn se miech moichmol mit enn Wahnl dort nundr imm ej Hickl siche neue Arpl. Dos wor sehr schiene, wie dos Rackwahnl ibr de Obschläge n Barg nundrrumplte. Abr moichmol hiss's: "Du nimmst s Madl mitte", dos wor gornee schiene, do konnd iech nimmej machn, wos iech wollde und gefolgt hood se mier jo nee. Wenn ich amende of ej Bejmle geklattort wor, stond se undn und heulte, wal se ou nuff wollde, odr iech bann Noppr noochn Arfsnschnuutn g(k)uckte, hoodses drhejme ausgeklaffrt.

War will siech do wundrn, doss iech mier of daan Falde moichmol n Huhn ohnr rachte? Drhejme dorfte se jo kej Tatschl kriegn, abr of daan Gemejnflackl hoh iech se moichmol geheerich dorchgewackelt. Geheult hoodse jo suwiesu, do worsch ganz ejgool. Ou hoddse jo immr wos gutt for de Tachtln olle, die iechr zu vrdaankn hotte. Und daan Hindrgedankn hottiech ou noch, dosse do wiere nimmej mitgiehn wolln. Abr dodrmitte hottch mich vrracht, Wenns wiedamol hiess: "Du konnst a poor Arpl hulln", stondse schonn bann Wanl gerejt und do hiss's ou wiedr: "Du nimmst s Madl mitte!" Na und do hoichse hald ou immer wiedr amol dorchgewixt.