Grode nee!
Dr ahle Noppr hotte Futtr liegn,
Daan ganzn Boumbarg hindrn Dorfe rimm,
Su ejfach wor dos niemols reizukriegn,
Dos soogmr ei und gingn halfn nimm.
Su zwej - drei Fürchl brochtmr ganz gemietllich
Die mejstn Tage vu daan Barge rei,
Zorr Faspr kriggtmr Bruut und Quork mit Schnietlich,
Vill Spaass hottmr drbei und Luderei.
Su kommr lansom zu daar letztn Scheibe;
Vu Leipe har zug ej Gewittr uf,
Drnabn striet dr Noppr mit sann Weibe:
"De mechst n Wohn hulln", doch ar horrte ne druf.
Und langsom fieln schonn die orschtn Tröppl,
Sie battlte: "Su hullock schonn n Wohn"
Ar tot, os hättr ei san Uhrn Stöppl,
Ar wor ej richtschr ejgnsinnchr Mohn.
Mir rachtn Futtre zomm os wemmr tolle,
De Nopprn wor vorr Argr ganz eizwee,
Ar kohm ock immr mejos ei de Wolle,
Nischt sohrtr sunst os: "Grode, grode nee!"
Und wenntr froht, wos jetz drvo gebliebn?
We is dos olle: Noppr. Barg und Hee,
Mier sein jo olle aus dr Hejmat vorrtriebn ...
Ock ejs labt fort: Dos Wörtl: Grode nee!
|
