| De Angstriehre
Do wor ei Brenn ejmol ejne grusse Hukst und dr Preibsch Onkl sollde Zeuge sein. Dr Preibsch Onkl hotte enn ganzn Haufn Amtl, ar wor Genossenschoftsvursteror, Gesangsvreinsobmonn, wennr ou ne singn konnde, und Kommandaantstllvrtretr vu dr Feuorwehr, ar hotte ejne Bindorei und enn Lodn und mosste moichs liebe Mol ann Glanze ausrickn. Su suchte halt n Obt drvieri s Tantl wiedramol s schworze Zeug, ej weisses Hembe und de gewixtn Suntschschue zomm und hullte de Zylindrschachte vunn Klejdrkostn off dr Schlag getroffn. Nischt os Wolle und Fatzn sof se, do wor doch ej Moisenaast drinne, dr holbe Zylindr wor zrschrutt.
Wie mochtn die Äsr ock off daan Kostn nuff komm sein? Und morne wor de Hukst! Na dr Onkel hottes ne wichtch "Do borgschmr n Zylindr halt vu Schmutzr Adolfn". Dos wor dr Noppr, ar wor Vorsteror, do hottr jo enn. Dr Onkl hullte n Zylindr glei rimm und probiertn ou grodewaags uf. "Doss abr dr Adolf noch enn grissorn Koop hood, hättch ne gedocht" sohtr, wie dn dr Hutt bis of de Uhrn toschte. "Nej su konnste ne giehn", sohte de Taante. "Na, weste wos? Do lehmr ganz ejfach enn Streijfn Zeitung nei." Su machtn ses ou und wal de Tante ne traute, doss de Zeitung rausrotschn kennde undorn Schwejssladr, nohm se dn Fliegnleim und poppte daan zommgelehtn Streijfn Zeitung feste. Itz posste dr Zylindr. N andrn Tag, de Korche wor gerommelt vuul Leute, de Orgl summste gruussortich, zugn de Hukstleite ei, de Weibr hottn olle Schnopptichl ei dr Hand - bei ennr Hukst muss jo geflennt wardn - und de Mannr nomm de Zylindr ob. Dr Preibsch Onkl wollde ou, dos soogmr, abr s mosste ne giehn, ar zug und zarrte, abr dr Hutt ruhrte siech nee, se worn schonn bis bann Altore drhindn und dr Onkl hotte n Zylindr immr noch offe und zarrte dro rimm, es machte dr Onkl enn mächtichn Rock und do hottr Zylindr ei dr Hand ... abr im Koop rimm wor ej breijtr Strijfn zu sahn und dr Onkl machte ej Gesichte wie de Kotze, wenns dunnort.
Na olls hood ej Ende (ock de Worscht hoodr zweje), su worsch ou mit dar Hukst und do kohm ou dr Onkl hejm und schmiess zororscht daan Zylindr offs Kanabee. Im Koop rimm finklte immrnoch dar brejte, rute Streijfn und droffe war kej ejnziches Hierchl mej. Die popptn drfier olle ei Schmutzr Adorfns Zylindr drinne. Do wor ei dr Warmt dr Fliegnleim ufgewejcht und hotte daan Hutt feste gepoppt, dossr baale ne wär luszubrengn gewaast. Und wos hotte dr Onkl olls ausgestandn!
Ar schimpfte abr ou: "Do hoich miech immr gewundort, wenn de Leute vu ennr Angstriehre redtn. Na jetz sah iechs ei und koon ou ej Wörtl mitredn; und so koon jet dr Zippl odr dr Zappl komm, ej sich Ludr brengt su leichte niemand mei off mann Koop."
|
